Мицкоски вели дека Уставен го укинал линеарното покачување на пензиите, од судот му вратија: „Одлука не е донесена“

Добивај вести на Viber

Премиерот Христијан Мицкоски на денешната седница за пратенички прашања обвини дека Уставниот суд го укинал линеарното покачување на пензиите и дека се работело за нефер одлука.

„Последните информации се дека веќе одлуката е донесена и потпишана од нејзина страна и дека пензионерите веќе нема да добиваат линеарно зголемување на пензиите, туку согласно процентите утврдени по законот. И тоа само за информација значеше дека 70 проценти од пензионерите ќе добиваат помала пензија од следниот месец, поради оваа иницијатива на оваа судијка која е дел од Уставниот суд“, рече тој.

Мицкоски истакна дека ваквата одлука не е фер, бидејќи Уставниот суд ја укинува одлуката, а нема да се зачуди доколку истата судијка во Уставниот суд донесе одлука за одмрзнување на платите на судиите и обвинителите.

„Од аспект на фискален товар, помалку пари ќе даде Буџетот, но од аспект дали е тоа фер, не е фер затоа што во време на транзиција кога малкумина олигарски го приватизираа и разграбаа македонското стопанство или поголем дел го уништија, најголем дел од овие пензионери со ниски примања, 8.000, 9.000, 10.000 или 12.000 денари се резултат на тој процес во времето на транзицијата. И затоа тие добиваат така ниски пензии.

Целта на линеарното зголемување беше да се намали ХДИндексот, а да се зголеми стандардот на пензионерите и на тој начин да се намали степенот на сиромаштија“, нагласи Мицкоски и додаде:

„Замислете истовремено најверојатно следната одлука којашто ќе дојде од истиот суд е да ги одмрзнеме платите на судиите и обвинителите. Значи на пензионерите им се укинува правото, но затоа пак на овие обвинители и судии бидејќи се незадоволни со 2.500, 3000, 4.000 евра ќе треба да им се одмрзнат платите, а пензионерите со 10.000, 12.000 денари коишто треба да добијат 1000 денари зголемување сега овој месец, тие се побогати од овие малкумина судии и обвинители коишто ја контаминираат оваа професија“.

Уставниот суд пак, реагираше дека не е точна информацијата која премиерот ја сподели со јавноста, нагласувајќи дека таква конечна одлука сѐ уште нема.

Од Судот информираат дека на седницата од 19 ноември била поведена постапка и со мнозинство гласови бил изразен сомнеж во уставноста на член 2 од Законот за изменување на Законот за пензиски и инвалидски систем. Постапката сега е во втора фаза, во која се прибираат мислења од надлежните институции, по што ќе следи гласање.

„Судот укажува дека на 24. седница одржана на 19.11.2025 година со мнозинство гласови, изрази сомнеж во уставноста на членот 2 од Законот. Во тек е втората фаза од постапката во која се бараат мислења од доносителот и од предлагачите на Законот, по што ќе следува конечна одлука“, велат од Уставниот суд.

Судот дополнително појасни дека не ја разгледува уставноста на претходните покачувања од 2.500 денари, затоа што иницијативата за тоа веќе била отфрлена – тие одредби биле привремени и веќе не важат.