Мисајловски верува дека Мицкоски бил следен од дронови

Добивај вести на Viber

Министерот за одбрана Владо Мисајловски, вечерва во „Клик Плус“ на ТВ21 рече дека институциите сериозно треба да ги испитаат индициите за следење на премиерот Христијан Мицкоски.

Премиерот глемо внимание привлече на себе кога на сесијата за пратенички прашања во Собранието рече дека бил мета на следење од страна на службите кои треба да разузнаваат и контраразузнаваат.

- Ја имавме првата конститутивна седница на Советот за безбедност, каде што можевме да ги слушнеме моменталните состојби во Македонија и пошироко, имаа излагања и АНБ, и Генералштабот. Можам да кажам дека безбедносната ситуација во Македонија е стабилна, но многу треба да водиме сметка за многу повратници од жаришта, и за протекување многу доверливи информации меѓу службите. Особено онаа информација која протече дека премиерот го следеле додека бил претседател на опозицијата, но и многу лица од опозицијата, и тоа мора да се истражи, рече Мисајловски.

Претходно, Мицкоски на собраниската говорница рече дека скандалот ќе биде обелоденет во зависност од степенот на класифицираниот материјал.

„Тука еве е поранешниот министер за внатрешни работи , до него често допираше гласот, но за жал немаше резултати кога стануваше збор за опозицијата. Но затоа се дигаа дронови над мојата куќа, дронови над мојата куќа во Прилеп, кога одам на терен се креваат дронови и тоа е се замислете во белешките на службите кои што треба да разузнаваат или контраразузнаваат . Го разузнавале претседателот на опозицијата. Нормално е тоа?  И сега се уплашени. Јавноста ќе дознае, но јас нема да правам естрада  и театар. На затворена владина седница сето тоа ќе биде презентирано , ќе ги согледаме сите законски можности да сето тоа се декласифицира. Нема спас, не им бега одговорност“, порача Мицкоски.