ММФ:Европа во криза, Азија во подем

Добивај вести на Viber

Eврозоната нема да излезе од рецесија годинава и ќе забележи пад на бруто домашниот производ од 0,4 %. За догодина економскиот раст во се проектира на  0,2% , а кризата дополнително ќе се продлабочи, ако европските лидери итно не преземат соодветни мерки, се наведува во извештајот на Меѓународниот монетарен фонд (ММФ) посветен на глобалните економски перспективи, a објавен денеска во Токио. Според ММФ,  најголемата економија во еврозоната, Германија, ќе забележи економски раст од  0,9% за оваа и за идната година, Франција годинава ќе ја заврши со 0,1% раст, а догодина ќе има 0,4%. Велика Британија ќе забележи пад на БДП од 0,4% за 2012-та , а во 2013-та економски раст од 1,1 %. Италија и Шпанија остануваат во рецеција и следната година, исто како и Грција и Португалија. За Грција се предвидува економски пад од шест проценти за оваа и четири проценти за следната година, а за Португалија негативен раст од три проценти во 2012 и за еден процент за догодина. За земјите од Централна и Источна Европа, ММФ оценува дека кризата во еврозоната има ограничено влијание, па во текот на оваа година тие ќе забележат раст на БДП од два проценти, а  во следната од 2,6 проценти. Најдобри резултати меѓу државите од Централна и Источна Европа ќе забележат Летонија, Литванија и Турција. Економскиот раст кај Бугарија е проектиран на 1% годинава и 1,5% во 2013, додека за Србија, Унгарија, Хрватска и Чешка, кои годинава се во рецесија, ММФ предвидува подобрување  на состојбите во текот на 2013 година и економски раст меѓу 0,4 и 2%. Најголем раст Фондот предвидува за Кина кај која годинава се очекува да се забележи зголемување на БДП од 7,8 проценти, а следната година меѓу осум и 8,5 отсто. Прогнозите за Индија и Русија се нешто поскромни. Индискиот БДП годинава ќе се зголеми за 4,9 проценти, а идната година за шест отсто, додека за Русија се предвидува економски раст од 3,7 оваа и 3,8 проценти во 2013 година. Третата по големина економија во светот Јапонија ќе забележи економски раст од 2,2 %, или 1,2% во 2013. Во извештајот се посочува дека најголемата светска економија, САД ќе мора да ги подобри своите државни финансии и да преземе умерени краткорочни мерки со цел да не го загрози кревкиот економски раст. Според Фондот, САД се изложени на потенцијален најголем ризик поради кризата во еврозоната.