Монетите од 50 дени заминаа во историјата, ама уште ни ги наплаќаат!

Добивај вести на Viber

Иако Народната банка на Македонија од почетокот на годинава официјално ги повлече од оптек 50-те дени, тие и понатаму се користат, а како најсвеж пример е понеделничкото намалување на цената на бензините за половина денар или пак сметката за струја која може да изнесува 2.300,50 денари, пишува Дневник, именувајќи го ова како „легитимен грабеж“. Советот на Народната банка донесе одлука за повлекување од промет на кованите пари во апоен од 50 дени и одлучи најнискиот апоен да изнесува 1 денар. Иако сите сфатија дека кованицата од 50 дени конечно оди во историјата, од НБМ објаснуваат дека одлуката за најнискиот апоен на денарите во прометот се однесува само на готовинскиот и безготовинскиот платен промет и на деловните книги. „Досегот на одлуката не се однесува на утврдувањето цени и тарифи врз основа на соодветни прописи, методологии и тарифни системи. Со други зборови, одлуката не треба да се сфати во смисла дека при формирањето и утврдувањето на цените и тарифите не се користат децимали. Само при плаќањето и наплатата, како и при водењето на деловните книги потребно е износите од 0 до 49 дени да се заокружат на 0, а износите од 50 до 99 дени да се заокружат на 1 денар“, објаснуваат од Народната банка на Македонија. Ваквото заокружување на сумата, познавачите коментираат дека не чини околу милиони евра годишно. Токму од овие ситни и за многумина безначајни, се полнат нечии каси со дополнителен приход, пишува Дневник чија пресметка покажува дека ако во еден ден во некој од поголемите супермаркети на само 1.000 граѓани на сметката им се заокружи крајниот износ на еден денар, ќарот дневно ќе биде 500 денари, месечно 15.000 денари, а годишно дури 180.000 денари.