Морачанин: Нема простор за ново мнозинство, има укажувања за датум за преговори

Добивај вести на Viber

Коалиционите партнери на премиерот Зоран Заев, кој синоќа си поднесе оставка кажаа дека на Македонија и треба стабилна Влада, и дека се очекува енергетска криза. 

Од ЛДП и ДОМ кажаа дека очекуваат да слушнат кои се плановите за понатаму, каде ќе се движи Македонија. Маја Морачанин од ДОМ вели дека нема простор за ново мнозинство, и дека има укажувања за датум за преговори. Тие се надеваат дека ќе почнеме преговори со ЕУ.

„На Македонија и е потребна стабилност. Се соочуваме со криза и се уште трае пандемијата на Ковид-19. И ДОМ и ЛДП се прогресивни партии, а во следниот период веруваме дека ќе се отпочне процесот за преговори со ЕУ. Ние нема да инсистираме да се повлече Заев, чија оставка тој кажа дека е од морални и етички причини. Но, мора да разговараме и да знаеме кои се визиите на новиот премиер, да видиме која е идејата“, рече Морачанин.

Лидерот на НСДП, Тито Петковски попладнево, пред средбата на коалициските партнери со премиерот во оставка Зоран Заев, изјави дека не треба да има предвремени парламентарни избори, туку дека актуелната Влада треба да продолжи со работа.

Лидерот на ДПА, Мендух Тачи, денеска изјави дека ништо драматично нема да се случи по најавената оставка на премиерот Зоран Заев.

„Ништо посебно, не гледам никаква причина нешто драматично да се случи. Сакаат да ја изместат темата. Беа локални избори. Ако сакаат да зборуваат за легитимитет на влада, оваа влада и на овие избори има легитимитет. Апсолутно има многу повеќе гласови од опозицијата. Мислам дека ништо драматично нема да се случи“, рече Тачи пред Владата, каде замина на состанко на коалиционите партнери.

Заев по поразот на локалните избори, си поднесе оставка од функцијата лидер на СДСМ, и премиер. ДОМ, ЛДП, НСДП и ДПА остануваат во владејачката коалиција, соопштија лидерите на овие партии.