Мртвиот бездомник најден во Битола е убиен, осомничен неговиот пријател

Добивај вести на Viber

Мртвиот бездомник кој пред неколку дена беше пронајден мртов во Битола починал како резултат на насилство, а не од ладното време. Како главен осомничен се води неговиот цимер и пријател. 

СВР Битола затоа поднесе кривична пријава против П.А.(53) од Битола, поради постоење на основи на сомнение за сторено кривично дело „убиство“.

Настанот се случил во текот на ноќта помеѓу 24 и 25 јануари во точно неутврдено време, пришто пријавениот со употреба на физичка сила и тврди предмети на свиреп и подмолен начин, му нанел повеќе повреди по целото тело и на тој начин го лишил од живот С.Д. (48) од Битола, со кого заедно живеел во иста куќа на ул. 4. Ноември во Битола.

Пријавениот со намера да го прикрие ова свирепо убиство, во времето околу 05,50 часот на 25 јануари се упатил во соседната куќа, барајќи помош кажувајќи дека НН лица ги нападнале додека спиеле, по што истиот е хоспитализиран во Клиничка болница во Битола, поради укажување медицинска помош, заради повредите за кои изјавил дека настанале при тој напад.

На местото на настанот увид извршил Јавен обвинител од Битола како и увидна екипа од СВР Битола. Од увидот, од извршените вештачења како и од обавените разговори со повеќе лица, вклучително и со пријавениот, констатирано е постоење основано сомнение дека П.А. е сторител на кривичното дело.