МВР: Две жени се заглавиле во лифт, полицијата ги извлекувала

Добивај вести на Viber

Две жени се заглавиле во лифт во центарот на Скопје, по што полицијата морала да ги извлече, откако била исклучена струјата во зградата од превентивни причини поради пожарот во Универзална сала.

„Од страна на екипи на ЕВН во целата околина на салата е прекинато снабдувањето на електрична енергија, при што на ул. „Петар Поп Арсов“ во лифтовите на зградите имаше заглавени две жени, кои беа извлечени од страна на Единицата за интервентна полиција“, соопшти МВР.

Дополнително, од таму известуваат дека на други две лица им се слошило од вдишување на чад и биле префрлени итно во болница.

„Денеска (09.04.2024) околу 09.45 часот во СВР Скопје е пријавено дека настанал пожар во Универзалната сала во Скопје. Веднаш по добиената пријава, на лице место се упатени полициски службеници и припадници на Бригадата за противпожарна заштита, кои околу 11.30 часот го изгаснале пожарот. Со возило на Итна медицинска помош во Клиниката за токсикологија се однесени две лица Е.С. (48) и А.Т. (41) поради вдишување на чад“, известува министерството.