МВР уште не може да му влезе во трага на бизнисменот Сеад Кочан

Добивај вести на Viber

Бизнисменот Сеад Кочан уште не им е достапен на органите на прогонот.

МВР уште не може да му влезе во трага, а од него нема никаков глас.

Надлежните не откриваат детали за јавноста во однос на потрагата а дел од медиумите веќе пишуваат дека сопственикот на „Трансмет“ „киднал“ од земјава истата вечер по издавањето на наредбата за апсење. 

Потерница за Кочан беше издадена во четвртокот, a MВР почна да го бара вчера.

Адвокатскиот тим на Сеад Кочан првично соопшти дека за одлуката која Кривичен ја донесе за притвор на бизнисменот дознал од медиумите а до него не стигнало никакво решение и се додека не стигне неговиот клиент е слободен граѓанин.

Кочан е газда на телевизијата ТВ Нова. Неговото име беше споменувано и во „политичките бомби“ што ги објавуваше СДСМ. 

Во објавените снимки поранешниот  премиер Никола Груевски го именуваше Кочан како „лицето што вози сеат“. Токму во еден од разговорите што го обелодени СДСМ  се зборува за конзорциум што би требало да го формира лицето „Сеат Ибица“ . 

Во објавениот разговор меѓу поранешниот премиер, Никола Груевски и поранешниот генерален директор на ЕЛЕМ, Влатко Чинговски се спомнуваат директорите на повеќе градежни компании меѓу кои беа и „Трансмет“ и „Силекс“, кои заедно со фирмата „ВАТО“, сега СЈО ги товари дека со лажна документација  исмпумпале 17 милиони евра од РЕК Битола.