МЗШВ: Ниту една институција во Крива Паланка нема да остане без дрва за огрев

Добивај вести на Viber

За обвинувањата на актуелниот градоначалник на општина Крива Паланка, Арсенчо Алексовски, упатени кон Министерството за земјоделство, шумарство и водостопанство, од министерството известуваат дека МЗШВ нема ингеренции да дава наредби поврзани со снабдување со огревно дрво, ниту пак да влијае врз тендери за снабдување со огревно дрво.

„Тоа е надлежност на Јавното претпријатие Македонски шуми, а МЗШВ како институција која соработува со ЈП Македонски шуми, е во постојана комуникација со претпријатието. Во таа насока, Ве информираме дека ЈП Македонски шуми, навреме ќе обезбеди дрва за огрев за сите училиштата и другите институции во Крива Паланка, бидејќи подружницата на ЈП Македонски Шуми во Крива Паланка „Шумско Стопанство Осогово“, веќе има доставено документација за учество на јавен повик за снабдување со огревно дрво до општината Крива Паланка“ - додаваат од МЗШВ. 

Сите основни училишта во Крива Паланка, гимназијата, домот за ученици и Територијалната противпожарна единица од градот ќе останат без дрва за огрев поради несериозното и незаконско работење на Министерството за земјоделство, шумарство и водостопанство, обвини претходно Алексовски.

Тој кажа дека на три последователни тендери за набавка на огревно дрво кои општината ги распишала од 1 авуст до 15 септември годинава на ниту еден не се јавило Јавно претпријатие „Македонски шуми“, подрачно шумско стопанство, „Осогово“, Крива Паланка.