НАЈЧЕВСКА ЗА АЛБАНСКАТА АКАДЕМИЈА: Мислам дека граѓаните од сите етнички групи треба да се спротистават на ваков вид на измотавање на градоначалниците
Објавено во: Македонија 15 Октомври, 2024
Професорката Мирјана Најчевска ја коментира најавата дека градоначалниците од „Вреди“ ќе ја финансираат Албанската академија на науки.
Таа праша дали сите проблеми во овие општини се решени.
„Беззаконието кое го промовираат политичките партии едноставно не смее да биде поддржано и прифатено. Настрана од законските пречки: Прво, ако имаат вишок пари општините, тогаш не треба да им биде даден ни денар за поддршка од страна на државата. Второ, ме интересира од која ставка на буџетот на општината ќе издвојат.
Трето, што мислат граѓаните во тие општини? Се им е средено во општината? Ова последното е најважно. Во сите спомнати општини има проблеми со комуналиите, справувањето со сметот, чистата вода, сигурноста на улиците, заштитата на животната средина, функционирањето на основните и средните училишта и градинките, јавниот превоз, ... Мислам дека граѓаните од сите етнички групи треба да се спротистават на ваков вид на измотавање на градоначалниците“, пишува Најчевска на социјалните мрежи.