Добивај вести на Viber
Годинава и догодина македонската економија ќе расте со забрзано темпо, остварувајќи раст на БДП од 3,7% во 2014-та и 4,4% во 2015-та година, прогнозира Советот на НБРМ, кој денеска ја одржа првата седница за годинава.
„Досегашните остварувања во реалната економија и најновите расположливи податоци упатуваат на натамошен солиден економски раст, на годишно ниво“, стои во соопштението на НБРМ.
Во текот на последниот квартал од изминатата година монетарните услови беа непроменети, така што максималната каматна стапка на аукциите на благајнички записи се’ уште е на нивото од 3,25 отсто, соопштуваат од централната банка.
„Инфлациските притисоци и натаму се намалуваат, а во последните месеци и со малку поголем интензитет од очекуваниот. Освен кај вкупната инфлација, забавување беше забележано и кај базичната инфлација, што беше во согласност со проектираните движења. Растот на потрошувачките цени во четвртиот квартал се сведе на нивото од 1,3 отсто, на годишна основа. Со тоа, просечната годишна инфлација за 2013 година изнесува 2,8 отсто и во целост се совпаѓа со проекциите“, заклучил Советот на НБРМ.
Народната банка регистрира и значително зголемена кредитна активност во четвртиот квартал од 2013-та, како и промена во структурата на кредитирањето, во полза на кредитите насочени кон корпоративниот сектор.
„Овие поволни остварувања претставуваат индикација за можно стабилизирање на согледувањата на банките за ризиците од пласманите во овој сектор, што делумно може да произлегува и од досегашното монетарно олабавување“, се наведува во соопштението на највисоката монетарна институција во земјава.