ФАКТОР АНАЛИЗА: Профитни маржи над 50 отсто - Кои се и колку заработуваат најпознатите извршители?

Добивај вести на Viber

Профитни маржи повисоки и од 50 отсто остваруваат канцелариите на извршителите, што може да се види од споредбата на приходите и добивките што ги направиле нивните канцеларии во 2023, а за кои „Фактор“ ги обезбеди податоците.

Од една страна се приходите кои најмногу се должат на каматите и наградите кои ги остваруваат извршителите, а од друга страна се трошоците за плати во просек од четири до осум помошници и за закуп на просторот.. Разликата помеѓу едното и другото носат огромен профит за секој главен извршител како основач на канцеларијата.

Минатата година 93 евидентирани извршители наплатиле 159.761.407 евра, покажува објавениот извештај на нивната комора за 2023. Само на територијата на Основен суд Скопје и Кривичен суд Скопје биле присилно извршени 92.440.068 евра. 

Наплатата од граѓаните како поединци е рекордна - 41,9 милиони евра, резултат подобар од една година претходно - 40,5 милиони евра во 2022, која пред тоа важеше за убедливо најуспешна. Рекордна е и наплатата од државните институции како должници - 29,53 милиони евра, што е далеку најдобар резултат од претходните години. Од бизнисот, односно од правните лица, биле наппатени 90,34 милиони евра.

Извештајот забележува најголем број на извршени решенија во досегашното работење - 76.572 наплатени предмети. Овој резултат е за 14.057 предмети повисок од досегашниот рекорд - 62.515 во 2018. Бројот во 2023 е за 18.371 поголем од 2022.

Тоа е втора најдобра година на „ефикасност“ на извршителските канцеларии во историјата на нивното работење. Најдобрата за нив била 2017 кога наплатиле 166.224.905 евра. Резултатот на извршителите е подобар за 15,36 милиони евра од една година претходно. Во 2022 биле наплатени 144.350.068 евра.

Овие параметри оставаат простор Владата да направи анализа за „профитната маргина“ на услужната дејност чии претставници народот безочно ги нарекува „дерикожи“

Извршителите во последно време се на мета на јавноста. Често сме сведоци на јавни собири на кои граѓани протестираат и јавно го изразуваат своето лично незадоволство од системот за наплата на побарувања со извршување во кој крајна алка се токму извршителите кои за тоа се лиценцирани од државата. А.К.