Населението ни старее, а на огласите сѐ почесто се бараат негувателки за грижа на стари лица

Добивај вести на Viber

Ако ги погледнеме огласите за вработување, ќе видиме дека сѐ почесто се бараат жени за нега и грижа на стари и изнемоштени лица.

Во огласите е наведена возраста на лицата за кои се бара негувател, нивната здравствена состојба, дали се подвижни или не, условите за работа, дали негувателите треба со нив да бидат 8 или пак 24 часа, бројот на слободни денови во месецот.

„Има работа и сум работел на повеќе места во Скопје и Куманово. Денес нема ништо лесно, а мора да се работи“, раскажува Александар, кој чувал стари лица.

Жените кои со години се занимаваат со оваа работа, објаснуваат дека ако се сака, ништо не е тешко.

„Јас 10 години ја работам оваа работа, и досега сум сретнала само еден маж негувател, а сите други биле жени. Ако се има афинитет, оваа работа не е тешка. За работа се пријавуваат луѓе од цела Македонија, со тоа што почесто доаѓаат од источна и од јужна Македонија, и тоа во есенскиот и зимскиот период, оти станува збор за луѓе кои се занимаваат со земјоделство, и кога таа работа ќе заврши, чуваат стари лица, а во април, мај се враќаат во своите места. Има секакви случаеви од срцеви болни, до лица со мозочни удари, и лица со Алцхајмер, кои се најтешки за чување. И погрешна е перцепцијата дека нивните деца не сакаат да ги чуваат. Тоа не е точно, затоа што секој си има свој живот и мора да оди на работа.  Се заработуваат од 15.000, 16.000 денари, па до 20.000 денари, или евентуално ако се работи за тежок случај, а семејството е богато, може да плати и до 400 евра. Сумата зависи од повеќе фактори, дали негувателот ќе биде 8 часа, 24 часа или дури и за викенди со лицето“, додава скопјанка која работи како негувателка.

Од агенциите за посредување при вработување велат дека ваков кадар се бара, но има и луѓе кои доставуваат своја биографија и сакаат да бидат ангажирани како негуватели.

„Обично за оваа работа се бараат луѓе во Скопје, но имаше и апликанти од Берово на пример кои сакаат да чуваат стари лица. Најчесто се пријавуваат жени на возраст од околу 50 години, кои веќе имаат искуство и се грижеле за стари лица. На пазарот на труд се бараат негуватели и тоа се забележува во последно време“, велат од скопска агенција за посредување при вработување.

Демографот Дончо Герасимовски објаснува дека веќе две декади во Македонија населението старее и тоа е евидентно. Според него, треба да се има в предвид дека наталитетот е во негатива, но и младите се иселуваат и со тоа во неколку општини имаме старо население. Тој акцент става и на руралните средини, каде бројот на млади е многу мал и доминира старото население.

„Треба да се види демографската карта на општините и да се креираат политики и стратегии од државата, локалните самоуправи, невладините организации, затоа што ќе имаме многу луѓе кои нема да можат сами да обавуваат широк спектар на обврски и нив ќе им биде потребна помош. Нема да можат сами да се грижат за себе, а дополнително имаме и лица кои се со инвалидитет или со посебни потреби“, рече Герасимовски.

Освен Македонија, и другите земји во регионот се соочуваат со стареење на населението. Според експертите, тоа ќе се почувствува во годините кои доаѓаат и ќе го влоши и квалитетот на живеење.

фото freepik.com