Назначен нов директор на Државна кардиохирургија на местото на Сашко Јовев
Објавено во: Македонија 22 Јуни, 2023
Министерството за здравство информира дека за нов директор на Универзитетската клиника за државна кардиохирургија е назначен д-р Марјан Шокаровски, на местото на професорот Сашко Јовев, кој пред две и пол недели под контроверзни околности беше разрешен од Фатмир Меџити, министерот за здравство.
Шокаровски е дел од тимот на клиниката уште од нејзиното основање и супспецијалист по кардиохирургија, завршена во Универзитетски клинички болнички центар- Загреб, Хрватска со повеќегодишно хируршко и академско искуство во оваа област. Раководител е на оперативниот блок, ангажиран е и како асистент на Медицински факултет-Скопје.
„Тој е дел од тимот на досега извршените трансплантации на срце во нашата држава, вклучен и во иновативните хируршки интервенции на срце со минимален инвазивен пристап. Исто така се едуцирал во повеќе земји, како Германија, Австрија, Англија, Франција, Бугарија, Србија и присустувал на голем број меѓународни конгрес“, објави МЗ.
Меџити кога го разреши Јовев рече дека ќе му остави простор на коалициониот партнер СДСМ да предложи ново решение за директорската функција.
Истовремено МЗ известува дека за нов организациски директор на Клиниката за државна кардиохирургија е назначен Исак Јакупи. Изминатиот период медиумите известија дека неговиот претходник Гани Фетаи си поднел оставка.