Добивај вести на Viber
Ниту едно од решенијата што стигнале до комисијата на Народната банка на Република Македонија не ги исполнило барањата за изградба на нов функционален објект којшто ќе ги задоволи сегашните и идните потреби на банката. Затоа, соопштуваат од НБРМ, изготвена е проектна задача и објавен анонимен конкурс за изработка на идејно решение за новиот објект на оваа институција.
„Трудовите коишто беа доставени не понудија објекти што се препознатливо архитектонски проектирани и дизајнирани со современи конструктивни системи. Во понудените решенија нема архитектура со еден похрабар концепт, современа технологија, богат колорит и материјали, ниту пак архитектура што ќе дава посебен дух и белег на плоштадот Македонија и на пошироката околина на центарот на Скопје. Понудените проекти, во однос на катастарската парцела на којашто треба да се изгради објектот, не дадоа решенија поврзани со барањата за сообраќај и пристап до објектот, заштита од пожари, безбедност и енергетска исплатливост“ стои во заклучоците на деветчлената комисијата составена од професори и академици од областа на архитектурата, градежништвото и уметноста.
Од Народната банка соопштуваат дека ќе ја вратат доделената парцела и ќе побараат нова којашто би била посоодветна на нивните потреби.