„Не можеме да ја разбереме логиката на таквата одлука“: Украина разочарана од поддршката на Швајцарија на мировниот план на Кина

Добивај вести на Viber

Украина е разочарана од одлуката на Швајцарија да го поддржи таканаречениот „кинеско-бразилски мировен план од 6 точки“, се наведува во соопштението на Министерството за надворешни работи на Украина.

„Не можеме да ја разбереме логиката на таквата одлука“, соопштија од МНР и потсетија дека во Швајцарија се одржа првиот Глобален самит за мир на кој беше промовирана украинската формула за мир.

Министерството нагласи дека каква било дискусија за начините на мир во Украина не треба да се одвива без самата Украина.

„Покрај тоа, сите мировни предлози мора да се засноваат на Повелбата на ОН и да го почитуваат суверенитетот и територијалниот интегритет на Украина“, се вели во соопштението на украинското Министерство, пренесува Униан.

Се нагласува дека сите иницијативи кои не содржат јасна референца на Повелбата на ОН и не гарантираат целосно обновување на територијалниот интегритет на Украина се неприфатливи.

„Иницијативите кои не го признаваат фактот за неиспровоцираната вооружена агресија на Русија против Украина, ја поистоветуваат жртвата со агресорот, нудат деескалација на сметка на суверенитетот и територијата, Украина не може да ги поддржи“, се вели во соопштението.

Министерството за надворешни работи ја повика Швајцарија да избегне учество во „мировни иницијативи“ кои би можеле да го комплицираат процесот на постигнување сеопфатен, праведен и одржлив мир за Украина.

Швајцарија претходно денеска објави дека го поддржува „мировниот план“ на Кина и Бразил во однос на Украина.

Портпаролот на швајцарското Министерство за надворешни работи изјави дека кинеско-бразилската мировна иницијатива е добра бидејќи „повикува на прекин на огнот и политичко решение на конфликтот“ и „нуди алтернатива на агресивната реторика и на украинската и на руската страна.

Мировниот план што го објавија Бразил и Кина се состои од шест клучни точки и вклучува прекин на непријателствата и почеток на мировни преговори.

Нагласена е и потребата од заштита на цивилите и размена на воени заробеници.

Во исто време, кинеско-бразилскиот план не кажува ништо за повлекувањето на руските војници од Украина, казнувањето на воените злосторници или исплата на компензација на Украина за уништувањето, наведува агенцијата Киев.