НЕМА ТЕРМИНИ ЗА МАМОГРАФИЈА ЗА НАРЕДНИТЕ ТРИ МЕСЕЦИ - жените во Скопје принудени да плаќаат во приватните клиники

Добивај вести на Viber

Во сите шест јавни здравствени установи во Скопје каде што може да се направи мамографија нема термин за наредните три месеци. Оваа информација може да се провери и во делот за термини на веб-страницата на „Мој Термин“. 

На прашањето од МИА зошто нема термини и дали се работи на регулирање на овие важни прашања, Министерството за здравство не даде конкретен одговор и фокусот го стави на Националната скрининг-програма за рано откривање рак на дојка. Во недостиг на термини, а со цел навремени проверки, жените се принудени решението да го бараат во приватните клиники.

- Со цел да се олесни закажувањето, жените добиваат СМС-порака со точно време, ден и здравствена установа за скрининг-мамографија и нема потреба да се јавуваат кај матичен лекар за упат. За жени на кои ќе треба да се направат дополнителни прегледи, на пример, ехо и биопсија, радиологот ќе ги повика телефонски и ќе креира упат за дополнителните прегледи - стои во одговорот што МИА го побара од Министерството за здравство.

Оттаму информираа дека со Националната скрининг-програма за рано откривање рак на дојка, која започна овој месец, од 1 до 4 ноември се направени скрининг-мамографии кај 156 жени.

Со оваа скрининг-програма треба да бидат опфатени жените од 45 до 69 години кои не направиле мамографија во последните две години, како и жените на возраст од 40 до 44 години кои имаат член во семејството со рак на дојка или друг дополнителен ризик-фактор.

МИА го контактира и Здружението на приватни лекари. На прашањето како матичните лекари се справуваат со термините и издавањето упат за мамографија, претседателката на здружението, д-р Лилија Чолакова-Дервишова, вели дека Скопје е голем регион и тешко се наоѓаат термини, додека на пример во Велес по еден месец може да се најде термин.

- Жените во најголем процент, заради нивното здравје и брзата дијагноза, мора да одат на приватни специјалисти за да може тоа брзо да се придвижи и да се дојде до отстранување на тие туморозни формации што ги откриваме во нашите ординации - истакнува д-р Чолакова-Дервишова.

Од друга страна, таа појаснува дека кога матичниот лекар, користејќи ги сите методи во однос на ниво на примарен доктор ќе забележи дека нешто не е во ред, веднаш се издава итен упат со цел брза реакција.

Решение за регулирање на термините, според д-р Чолакова-Дервишова, е регулирањето на неограничениот број услуги што ги нуди здравствениот систем со ограничени средства. Додава дека честопати сигнализираат до Министерството и потребно е да се воведе основен пакет на услуги.

- Здравствениот систем ни е оптоварен, здравствен кадар има сѐ помалку во внатрешноста на Македонија. Крајно време е да се воведе основен пакет и да се знае за колку пари, кој колку може да направи. Таква практика има секаде во светот и се знае колку пати треба да се направи преглед за одредена работа - апелира докторката.

Вината за овие проблематики не е само на едно место. Честопати се случува пациентот кој веќе има термин да не го искористи, земајќи го местото на друго лице.

Свеста останува колективно на општеството, но и на ресорните институции да одредат точно и конкретно колку пати едно лице и во колкав временски период може да закаже термин за одреден здравствен проблем, користејќи ги разумно здравствените услуги.