НЕМА ВЕЌЕ НЕИСКОРИСТЕНИ СРЕДСТВА – во Собрание измени на Законот за концесии, Владата ќе може да ги пренамени „вишокот“ пари

Добивај вести на Viber

Законот за концесии и јавно приватно партнерство ќе се менува со цел да се создадат услови за промени на договорите преку анекси и искористување на неискористените средства од еден за друг проект, односно да се пренаменат.

Како што наведуваат од Министерството за енергетки, кои се предлагачи на законските измени, со нив ќе се озоможи да се создадат околности договорена обврска, планираните средства да се искористат за други проекти од јавен интерес, се до целосно искористување на средствата.

- Со предложеното законско решение се врши дополнување на Законот за концесии и јавно приватно партнерство, со одредби, кои се однесуваат на измена на договорот односно склучување на анекс на договорот за концесија, во случаи кога ќе се создадат околности од кои исполнувањето на договорената обврска помеѓу договорните страни за дел од договорот за концесија нема да е целисходен, односно нема да ги даде очекуваните резултати. Да постои можност планираната инвестиција за тој дел од договорот да се искористи за други проекти од јавен интерес, која ќе се финансира со остатокот од неискористените средства предвидени со одлуката со која се врши промена на намената на дел од средствата – се нагласува во предлог измените доставени до пратениците.

Посочено е дека со овие измени се врши дорегулација на одреби од Законот кои се однесуваат на измена на договорот за концесија. Се уредува можноста за измена на договорот за концесија од страна на Владата, а по претходна направена анализа на проценка на економската и функционалната оправданост и обезбедена согласност од концесионерот. Може да донесе одлука за склучување на анекс на договорот за концесија за промена на намената на дел од средствата.

За таа цел Владата може да донесе одлука со која ќе се утврди намената на средствата, износот на средствата кои биле потребни за спроведување на дел од предметот на концесијата, начинот и динамиката на реализацијата на намената на средствата, согласно со правата и обврските на концесионерот утврдени со веќе склучениот анекс на договорот за концесија.

Со измените е дефинирано дека можноста за склучување на анекс на договорот за концесија ќе важи три години од денот на влегување во сила на Законот, во кој период Владата како концедент може да го измени договорот согласно одредбите на Законот. Концесионерите кои до денот на влегувањето во сила на овој закон, имаат склучено анекс на договор за концесија можат да склучат нов анекс согласно одредбите од овој закон во рок од три години.

- Кога средствата согласно склучениот анекс не биле целосно искористени во предвидениот рок поради непредвидени околности, врз основа на претходно направена анализа на проценка на економската и функционалната оправданост и по претходна обезбедена согласност од концесионерот, Владата на Република Северна Македонија може да донесе одлука за склучување на анекс на договорот за концесија за дореализирање на тековните проекти односно за промена на намената на делот од средствата, со цел нивно доискористување за инвестирање во проекти од јавен интерес – се наведува во предлог измените доставени во Собранието.

Притоа е посочено дека анализата за проценка на економската и функционалната оправданост ја изготвува Владата. Во одлуката се утврдува намената на средствата, износот на средствата кои биле потребни за спроведување на анексот на договорот за концесија, како и начинот и динамиката на реализацијата на доискористување на средствата кои не биле искористени.

П.О.

Фото: Фактор