Добивај вести на Viber
Во август, невработеноста во Полска, споредено со јули, се намали за 0,1 посто, на 13%, соопштија од полското Министерство за труд. Бројот на невработени лица, се намали на 2,09 милиони, пренесува агенцијата АФП.
Во август 2012 година невработеноста во Полска изнесуваше 12,4 проценти од работоспособното население.
„На крајот на годината, стапката на невработеност нема да надмине 14 проценти. Невработеноста е најизразена во текот на есента, но зголемувањето ќе биде помало во споредба со минатата година“, се наведува во соопштението.
Полска, единствената земја во ЕУ која успеа да забележи позитивен економски раст во текот на светската криза која настана во 2008 година, бележи скромно зголемување на економскиот раст, по забавувањето кое беше забележано во почетокот на годината.
Бруто домашниот производ (БДП) на Полска е зголемен за 0,4 проценти во вториот квартал, по растот од 0,1 проценти во првите три месеци од 2013 година.