Независниот полициски синдикат бара рамноправност и нови преговори со МВР

Добивај вести на Viber

Полициските синдикати со различно толкување на одлуката на Уставен суд со која не се поведува постапка за оценување на уставноста на членот 4 од колективниот договор потпишан од само еден синдикат. Според тој договор, досега само репрезентативниот синдикат беше вклучен во социјалниот дијалог. Независниот бара да биде рамноправен партнер во преговорите и донесување на нов колективен договор кој ќе го овозможи тоа. 

Репрезентативниот синдикат денеска остана недостапен за став, но во последното нивно известување се вели дека и тие бараат соработка со другиот синдикат.

„Како и претходно, но сега јавно, уште еднаш го повикуваме Гранскиот независен синдикат на полицијата на коректна синдикална работа, како и заедничка синдикална соработка за сите прашања од заеднички интерес на работниците, кои за МПС се единствена целна група“.

Дали заложбите за соработка на двата синдика ќе останат само декларативни, зависи и од новиот министер за внатрешни работи кој како работодавец е повикан да ги испита и реши споровите за тоа кој ќе ги брани правата на вработените во МВР. 

Министерот Оливер Спасовски за Телевизија 24 вели дека од понеделник планира средби со претседателите на двата синдиката и заедно со нив ќе бидат разгледувани можностите за нов колективен договор. За катастрофалните услови во кои работат припадниците на полициските сили, досега јавно зборуваше независниот синдикат, додека репрезентативниот ги призна состојбите дури по смената на неговото раководство во февруари годинава.