Ниту генерал ниту министер - Ковачки два пати извисен

Добивај вести на Viber

Драган Ковачки беше најголемото изненадување во дадените предлози од страна на опозицијата како иден технички министер во МВР, позиција за која се очекуваше да биде лице со подолг стаж во самата партија ВМРО-ДПМНЕ.

Предлогот даден од Христијан Мицкоски засега не е одобрен во разговорите кои се водат со Зоран Заев. Според премиерот во оставка министер за внатрешни работи не може да биде воено лице, односно дека најмалку три години треба да биде цивил пред да стапи на функција во МВР.

Ковачки е полковник во АРМ, и според неговата биографија е црвен кадар кој кариерата ја поминал во специјалните единици на војската, а потоа бил и дел од военото разузнавање.

Интересен е фактот што Ковачки не стигна до чинот генерал. Дел од опозициските медиуми обвинуваа дека Ковачки не добил потпишан указ од страна на претседателот Пендаровски за напредок во кариерата. На негово место друг припадник на АРМ наводно со помалку квалификации бил унапреден од политички причини.

Ковачки беше разрешен од позицијата командант на Првата механизирана бригада од Пендаровски. Претседателот на тој начин ги укина решенијата од претходникот Иванов за кои беше поведена и постапка од Државната комисија за спречување на корупција.

За членот 97 кој упатува на тоа дека воени лица не може да бидат поставени на раководни позиции во органите на државната управа контра аргумент е посочен со актуелниот заменик министер за одбрана кој исто така пред да стапи на функцијата бил офицер во АРМ и претходно дел од единицата Ренџери.

Ковачки инаку бил дел од специјалните единици во одбраната на државата во 2001 година, дипломец од првата генерација на Воената академија, учесник во првата мировна мисија во Ирак, одликуван со највисоки државни и НАТО признанија.