НОВ ТРГОВСКИ ЦЕНТАР ВРЕДЕН 20 МИЛИОНИ ЕВРА ЌЕ НИКНЕ ВО ГЕВГЕЛИЈА: Амбициозен е планот на инвеститорот, вели Мицкоски

Добивај вести на Viber

Премиерот Христијан Мицкоски денеска во Гевгелија присустуваше на поставување на камен темелник за изградба на Трговски центар, инвестиција вредна околу 20 милиони евра, со која, како што е најавено, ќе бидат отворени 350 нови вработувања.

-Многу амбициозен е планот на инвеститорот, но не и неостварлив бидејќи до сега како што и самиот инвеститор во својот говор овде кажа во рекордно време благодарение на амбициозниот тим и амбициозната работа на градоначалникот на Општина Гевгелија овој проект доаѓа во оваа фаза во која што е денеска, да можеме да поставиме камен темелник на инвестиција вредна самите слушнавте околу 20-тина милиони евра. Од тоа што можев во разговорите да дознаам некој детал повеќе дека ќе имаме околу 350 нови вработувања на почеток до максималниот капациет и 500-тини, изјави Мицкоски.

Оваа точка, посочи Мицкоски, е навистина значајна бидејќи околу 15 милиони возила годишно ќе поминуваат тука, тоа значи голема можност за бизнис, голема можност и за ширење и за проширување на инвестицијата.

-За Гевгелија ќе значи тоа многу, така што како претседател на Владата ценам дека секогаш кога во Македонија ќе се прават ваков тип на објекти ние сме тука да помогнеме, да го забрзаме овој процес, да го одблокираме ако е закочен за да можат овие инвестиции да бидат реалност, порача Мицкоски.

Нашата цел, подвлече Мицкоски, е да оваа година за прв пат да забележиме бројка на инвестиции која што ќе надмине една милијарда евра, со што како држава ќе бидеме во првите три по глава на жител кога станува збор за странски инвестиции. -Уште еднаш честитки на инвеститорот за одлучноста, благодарност до општината, до администрацијата, до сите што помагаа за оваа инвестиција да дојде во оваа фаза во која што е денес, изјави Мицкоски, од Гевгелија.