Нови мерки за купување станови по пониска цена

Добивај вести на Viber

Со две нови мерки донесени на вчерашната владина седница ќе се решава станбеното прашање на околу 1.200 семејства, истакна денеска портпаролот на Владата Александар Горѓиев. Со првата мерка која важи за семејствата што немаат валиден документ за сопственост на станот во кој живеат, тие ќе добијат можност да го купат станот по намалени цени за 15 до 30 проценти во однос на пазарната вредност. Доколку не се во состојба да го купат станот ќе им биде понуден закуп кој би бил повторно со цени помали од пазарните. Втората мерка пак се однесува на оние граѓани кои останале без станови поради тоа што тие им се одземени со процесот на денационализација и им се доделени на други сопственици. За нив ќе бидат обезбедени станови соодветни по квадратура со оние во кои живееле. За реализација на оваа мерка, посочуваат од Владата, најверојатно е дека ќе бидат изградени нови станови. Со првата мерка според проценките треба да бидат опфатени околу 1.000 семејства, а со втората уште нови 120 семејства.