Обама нема да го признае ерменскиот геноцид

Добивај вести на Viber

Претседателот на САД Барак Обама нема да го признае масовното убиство на Ерменците во Отоманската империја во 1915 година како „геноцид“, соопшти весникот „Гардијан“.

Белата куќа ја донела оваа одлука поради отпор во Стејт департментот и Пентагон, наведува весникот.

По повеќе од една недела внатрешни дискусии високи функционери во администрацијата на претседателот разговарале во вторникот со лидери на ерменската заедница во САД, пред јавно да ја објават одлуката.

Претставниците на Белата куќа ветија дека САД ќе ја искористи 100-годишнината од трагичниот настани во петокот, за да „повикаат за целосно, често и праведно признавање на фактите“.

Историчари проценуваат дека убиените Ерменци во 1915 година биле околу 1,5 милион лица и според многумина научници тоа може да се дефинира како геноцид. Турција сепак не смета дека тоа било геноцид, и тврди дека бројот на смртни случаи е преувеличен.

„Гардијан“ потсетува дека како сенаторот и претседателски кандидат Обама ги нарече убиствата на Ерменците пред еден век како геноцид и изјавил дека Владата на САД има обврска да го признае тоа. Во кампањата во 2008 година Обама вети дека ќе го признае ерменскиот геноцид, ако стане претседател.

Откако ја презеде власта сепак, Обама не ја користел оваа дефиниција, по секоја веројатност бидејќи Турција е клучен партнер на САД и членка на НАТО.

Јавното прогласување на одлуката во вторникот беше проследена со пораката дека министерот за финансии Џејкоб Лу ќе присуствува на церемонијата по повод одбележувањето на годишнината во петок во Ерменија. Претходно државниот секретар на САД Џон Кери се состана со турскиот министер за надворешни работи Мелвют Чавушоглу во Вашингтон.

Извори на „Гардијан“ велат дека во Вашингтон има бурна дебата дали да се признае ерменскиот геноцид на 100-годишнината и на тој начин да се исполни предизборното ветување на Обама, особено откако претходно овој месец папа Фрањо изјавил дека масакрот над Ерменците бил геноцид.