Објавен имотот на Бојан Маричиќ: Купил возило на старо, штеди за децата

Добивај вести на Viber

Државната комисија за спречување на корупција го објави Анкетниот лист на Бојан Маричиќ кој со превземањето на министерството за правда за прв пат стана државен функционер во својата политичка кариера, а според истиот поседува возило кое го купил на старо, вложувал во инвестициски фондови и подигнал кредит од 50.000 евра.

Поранешниот технички преговарач со ЕУ во имотниот лист пријавил стан од 65 метри квадратни во Скопје купен во 2014 со вредност од 3,6 милиони денари како заеднички имот со неговата сопруга. Пријавил и возило Цитроен Ц4 од 180.000 денари, произведено во 2008, а купено во 2015.

Уште сега штеди за иднината на своите две мали деца, па вложил и за едното и за другото по 1.100 евра во Инвестициски фондови од 2018 и 2019-та, а исто така отворил и денарски депозит за деца во Халк банка во 2020 и таму им чува 15.000 денари.

Од кредити, има еден подигнато од 3 милиони денари во 2015 и истиот треба да го враќа до 2047, како и уште еден потрошувачки од 200.000 денари.

Истовремено е објавен и анкетниот лист на Јетон Шаќири, новиот министер за информатичко општество и администрација, кој исто така за прв пат станува државен функционер.

Неговиот брачен другар има стан од 81 метар квадратен од 3 милиони денари, купен во 2018, но не е познато каде се наоѓа. Неговите родители имаат земјиште, куќа и деловен простор со вкупна вредност од повеќе од 20 милиони денари.

Шаќири пријавил свои три возила, од кои највредното му е Ауди А6 од 11.000 евра.

А.К.