Обвинение против поранешен градоначалник

Добивај вести на Viber

Основното јавно обвинителство Прилеп поднесе обвинение против поранешниот градоначалник на Прилеп, Марјан Ристески.

Тој се товари за несовесно работење во службата, односно дека како градоначалник извршил незаконски избор на директор на Домот за стари лица „Киро Крстески Платник“.

На распишаниот јавен конкурс за избор на директор на јавната установа во кој како посебен услов било предвидено работно искуство од 4 години по дипломирањето, Ристески донел решение со кое за директор на Домот избрал кандидатка која во времето на изборот имала работно искуство од 2 години и 6 месеци по дипломирањето и не го исполнувала посебниот услов предвиден во конкурсот.

Против директорката пак е отфрлена кривичната пријава за кривично дело злоупотреба на службена положба и овластување.

„Во конкретниот случај не произлезе дека осомничената на некаков начин ја искористила својата службена положба или овластување, дека ги пречекорила границите на своето службено овластување, па со тоа за себе или за друг да предизвикала некаква корист или на друг да му предизвикала некаква штета, ниту пак ова кривично дело е сторено при вршење јавни набавки или пак на штета на Буџетот на РМ. Надлежниот јавен обвинител утврди дека незаконските дејствија со изборот на осомничената за директор иако таа не го исполнувала посебниот услов наведен во јавниот конкурс ги сторил оној кој го извршил изборот“, информираат од Обвинителството.