ОБВИНЕНИЈА ПРОТИВ ГИНЕКОЛОГОТ АСАНИ И УШТЕ ДВАЈЦА ЛЕКАРИ: Задоцнетата реакција на лекарите и го загрози животот на Ваеповска

Добивај вести на Viber

Основното јавно обвинителство-Струга кривично ќе ги гони тројцата лекари-гинеколози кои пред две години на родилката од Дебар, Јилдз Ваеповска и го загрозија животот поради нивна задоцнета реакција, и извадија три здрави органи: јајник, матка и бубрег. Обвинителството, како што денеска соопшти, покрена обвинение за поранешниот директор на струшката болница гинекологот Мухамед Асани, еден специјализант по гинекологија и докторка.

Животозагрозувачките компликации настанале кога лекарите за да ја породат и направиле  царски рез, при што гинекологот Асани и неговиот асистент, на Ваеповска и ја оштетиле левата бубрежна артерија по што дошло до нагло влошување на состојбата на пациентката и не презеле никакви мерки за да ги утврдат причините за крварењето.

-Со терапијата која и ја дале дополнително ја влошиле состојбата на пациентката и задоцниле со реакцијата, поради што кај неа настанала огромна загуба на крв и западнала во состојба на шок. Во такви услови, првообвинетиот со асистенција на третообвинетата се решиле да извршат нов оперативен зафат за да го спречат крварењето, да и ја отстранат матката и левиот јајник иако на овие органи немало никакви промени или повреди. Откако и по затворањето на пациентката крварењето не престанало, тие се решиле за уште еден оперативен зафат при што хирурзите откриле дека крварењето доаѓа од оштетувањето на бубрежната артерија предизвикано при царскиот рез. Заради неможноста да се реконструира бубрежната артерија, таа морала да се подврзе и да се отстрани левиот бубрег со цел да се спаси животот на оштетената. Кога тоа било направено и крварењето било запрено, пациентката била препратена на лекување на Државната клиника „Мајка Тереза“ во Скопје, соопшти ОЈО – СТРУГА.