ОБВИНИТЕЛСТВОТО БАРА ПРИТВОР: Истрага за лажната дојава за бомба на скопскиот аеродром

Добивај вести на Viber

По кривична пријава од Министерството за внатрешни работи, обвинител од Обвинителството за гонење на организиран криминал и корупција поведува постапка против лице за кое постои основано сомневање дека сторило кривично дело Тероризам, соопшти обвинителството.

„Осомничениот на 16 овој месец во раните утрински часови преку телефонската линија за итни случаи 192 со умисла упатил сериозна закана за подметната бомба во воздухоплов на Меѓународен аеродром Скопје, на летот Скопје – Анталија. Веднаш по приемот на заканата од страна на Секторот за борба против тероризам, насилен екстремизам и радикализам биле активирани протоколите за антитерористичка проверка и по неколкучасовна проверка е утврдено дека станува збор за лажна пријава. Осомничениот со својата постапка создал чувство на страв и несигурност кај патниците и другите присутни на аеродромот, а воедно со активирање на протоколите за антитерористичка проверка го пореметил и севкупниот воздушен сообраќај“, стои во соопштението на Обвинителството за гонење на организиран криминал и корупција.

Од таму посочуваат дека е доставен и предлог за мерка притвор против осомничениот.

„Јавниот обвинител до судијата на претходна постапка при Основниот кривичен суд Скопје достави предлог за определување на мерка притвор против осомничениот образложувајќи ги околностите што го оправдуваат предлогот и упатуваат на тоа дека во конкретниот случај целта на притворот не би можела да се оствари со некоја друга мерка за обезбедување присуство на осомничениот“, велат од ОЈО-ГОКК.