Обвинителството ќе испитува како паднал ученикот од прозорец во Прилеп, но чека одговори од полицијата

Добивај вести на Viber

Основното јавно обвинителство Прилеп денеска чека известување од полицијата за тоа како пред два дена паднал 11-годишниот шестооделенец од прозорец од третиот кат од основното училиште „Гоце Делчев“. 

Според в.д. основниот јавен обвинител Лидија Салатоска Илиоска, овинителството претходно ѝ дало насоки на полицијата како да постапи и да ги извести.

Ученикот падна од највисокиот, трет кат, и се здоби со тешки повреди. Потоа увид направи полицијата на местото на настанот. Од училиштето известија дека станува збор за примерен, трудољубив, дружељубив одличен ученик и дека направиле сѐ за да помогнат.

- Од досегашните сознанија сметаме дека станува збор за несреќен случај, но на полицијата ѝ дадовме насоки да изврши разговори со медицинските лица кои интервенирале во случајот, со вработените од училиштето и со други лица.  Во текот на денешниот ден ќе добиеме извештај од полицијата за да се знае како понатаму да се постапи, изјави Салатоска Илиоска заСител.

Немилиот настан се случил од непознати причини во понеделникот, на 20 јануари во 14,35 часот, на големиот одмор во попладневната смена. Веднаш била повикана Итна помош и лекарите го нашле детето на тлото во полусвесна состојба. На одделот за анестезија, првично биле констатирани скршеници на петиците на нозете и сомнеж за скршеници на прешлените. Ученикот се лекува на детска хирургија во Скопје.