Маричиќ: Од денеска судските такси се поевтини за осум пати

Добивај вести на Viber

Министерот за правда, Бојан Маричиќ, објави дека од денеска трошоците за судски такси во првостепена постапка се намалуваат за осум пати, односно од максимални 48.000 на максимални 6.000 денари според законските измени и дополнувања на Законот за судски такси.

- Од денеска тие се од 480 до најмногу 6.000 денари во зависност од спорот. тужите осигурителна компанија, за надомест на штета од 3 милиони денари, ако вредноста е 2 отсто од спорот, граѓанинот до сега требаше да плати за судски такси максимален износ од 48.000 , а сега ќе биде само 6.000 денари. По старата тарифа, за другите понатамошни постапки, ќе платевте 288.000 денари за одлука, жалба и ревизија , а по новата тарифа, најмногу 36.000 денари доколку се жалите. Како втор пример, за долг од 15.000 евра започнувате парнична постапка. Ако судската таса е 2 отсто, по старата тарифа се плаќа 18.600 а по новата само 6.000 денари, рече Маричиќ.

Министерот рече дека ова решение е дел од стратегијата за намалување на сиромаштијата и исполнето ветување од владината програма.

- На луѓето на кои им беше скапо се откажуваа од тоа да ја бараат правдата во судниците. Сега граѓаните ќе бидат охрабрени по судски пат да ја бараат правдата, наведе Маричиќ.

Тој додаде дека судовите остануваат сами да ги менаџираат своите приходи, без разлика колку тие ќе се намалат со ова законско решение.

- Ние пред се размислувавме како да им се олесни на граѓаните да имаат пристап. Тоа нема да има трајна и голема штета за судовите. Загубата од судските такси нема да биде на штета на државниот буџет. Граѓани во поголем број ќе се одлучуваат да одат на суд и така ќе има повеќе приходи. Ние и натаму ќе се залагаме за зголемување на судскиот буџет. додаде министерот.