Од тезга до иновација: Како „Електронски Зелен Пазар“ ја дигитализираше традицијата

Добивај вести на Viber

Преку менторската програма поддржана од АППРСМ и JICA, стартапот „Електронски Зелен Пазар“доби насока, стратегија и нова доза на самодоверба. Под менторство на Милена Димковска од Регионалниот центар Битола при Фондацијата за развој на претприемништво – регионална и прекугранична соработка, компанијата направи значаен исчекор во дефинирањето на својата улога на пазарот. Разговаравме со основачот Васко Цветковски и менторката Димковска за тоа како изгледа да градиш дигитална платформа во агросекторот, чекор по чекор.

Васко Цветковски, како дојдовте до идејата за „Електронски Зелен Пазар“, дали беше инспирација, потреба или комбинација од двете?

Идејата се роди во 2018 година како комбинација од претприемачки поттик и технолошка можност. Сакав да започнам нешто свое, а истовремено да искористам алатки што тогаш станаа достапни за луѓе што немаат програмерско знаење. Целта беше да изградиме функционална платформа за онлајн продажба на земјоделски производи, која ќе биде ефикасна, достапна и поддржувачка за малите производители.

Милена Димковска, кои беа главните предизвици што ги забележавте кај „Електронски Зелен Пазар“ кога започнавте соработката?

Најголемиот предизвик беше недостатокот на формализирана стратегија, идејата беше одлична, но ѝ недостасуваше бизнис-рамка. Работевме на тоа да се изгради стабилна основа: како да се дефинира пазарната позиција, како да се постави комуникацијата со производителите и купувачите, и како да се создаде долгорочен модел што ќе функционира и во реални услови, надвор од ентузијазмот на стартот.

Васко Цветковски, како дознавте за менторската програма и што ве натера да се приклучите?

Платформата функционираше, но дојдовме до момент кога ни требаше некој надворешен увид, нова перспектива што ќе ни помогне да се структурираме. За менторската програма дознав преку информациите од АППРСМ, и веднаш ми стана јасно дека тоа е токму ресурсот што ни недостасува. Влеговме со отворен ум и со подготвеност да се соочиме со сопствените слабости.

Милена Димковска, кој пристап го користевте како ментор? Дали фокусот беше на стратегија, организација или нешто друго?

Најпрво се обидов да го разберам суштинското „зошто“ зад бизнисот. Потоа фокусот го ставивме на дефинирање на вредносната понуда, пазарната стратегија и подобрување на односите со партнерите, особено со производителите. Работевме и на делот на дигиталната комуникација и позиционирање, како и на приоритизација на активностите, бидејќи стартапите често се распространети во премногу правци одеднаш.

Васко Цветковски, кои се најзначајните промени што ги направивте благодарение на менторската поддршка?

Голема промена беше што престанавме да гледаме на платформата само како на дигитална алатка, почнавме да ја третираме како бизнис кој мора да има своја структура, насока и план за раст. Формиравме тим, ги преуредивме внатрешните процеси, и почнавме со појасна комуникација кон производителите. Тоа резултираше со поголема доверба и зголемен број на соработки.

Милена Димковска, дали гледате потенцијал за понатамошен развој на оваа платформа?

Апсолутно. Потенцијалот е огромен, особено ако се продолжи со поставување на јасни цели, градење на бренд доверба и фокус на корисничко искуство. „Електронски Зелен Пазар“ е мост меѓу традиционалното земјоделство и современите потрошувачки навики – токму тоа е неговата уникатност. Со проширување на мрежата и вклучување на повеќе поддржувачи, може да стане клучен играч на национално ниво.

Васко Цветковски, кои се следните чекори? Дали размислувате за извоз или нови дигитални сервиси?

Следната фаза е проширување на понудата и подобрување на логистичката мрежа. Работиме на тоа да ја интегрираме платформата со дополнителни функционалности за проследување на нарачките, подобра комуникација со клиентите и можност за поддршка на ЕУ проекти. Секако, размислуваме и за регионално присуство, но чекор по чекор.

Милена Димковска, како гледате на менторската програма во целост? Дали вакви програми можат да направат реална разлика?

Да, и тоа многу. Овие програми се критични токму за оние бизниси кои се на прагот меѓу идеја и одржливост. Тие внесуваат структура, самодоверба и чувство на припадност. Особено кога менторот и менторираниот имаат отворен дијалог и споделени цели, резултатите не доцнат. Би охрабрила што повеќе млади претприемачи да се вклучат.

Васко Цветковски, дали би продолжиле со менторство и во иднина? Што би им препорачале на другите мали компании?

Без двоумење – да. Менторството отвора врати, но и ве тера да ги погледнете работите со нови очи. На другите би им препорачал да не се плашат да побараат помош, не затоа што не знаат, туку затоа што сакаат да научат повеќе и да растат побрзо.

ПР објава