ОД ЗАДУТРЕ ПОЧНУВА ВАКЦИНАЦИЈАТА ПРОТИВ СЕЗОНСКИОТ ГРИП: Бесплатна за хронично болните и повозрасните, за останатите цената е 800 денари

Добивај вести на Viber

Во теков на викендов се прави дистрибуција во пунктовите на здравствените домови и центрите за јавно здравје на вакцината против сезонскиот грип, а вакцинацијата ќе почне од вторник. Здравствените власти информираат дека во овој период, кога корона вирусот е во фаза на широка распространетост, добро би било граѓаните да се заштитат барем од сезонскиот грип, кој исто така е сериозно заболување и може да направи големи компликации.

-Сведоци сме изминатите години дека имаше многу граѓани со хронични заболувања, кои поради заразата со сезонски грип имаа сериозни компликации. И од сезонскиот грип имаме доста смртни случаи, се разбира никако не може да се спореди со корона вирусот, кој е многу поопасен и посмртоносен, но сепак, сезонскиот грип знае да направи и миокардити и други тешки компликации, а се случува да доведе и до смрт. Затоа е добро, граѓаните да се вакцинираат во што поголем број. Ние советуваме тоа прво да го направат оние кои имаат хронични заболувања, посебно луѓето кои имаат ХОББ, дијабетес, срцеви заболувања и така натаму, и секако повозрасната популација, над 65 години. За нив оваа вакцина, како и секоја година е бесплатна, исто како и за трудниците и за децата од шест месеци до 5 години. За останатите граѓани, вакцината оваа година ќе чини 800 денари, велат за Фактор, епидемиолозите од повеќе градови во земјава.

Инаку, Министерството за здравство набави 40.000, кои ќе бидат бесплатни за ранливите категории граѓани, како и дополнителни количини за останатите кои ќе сакаат да се вакцинираат против сезонскиот грип.