Одбиени без причина: Конкурс за 60 офицери, а решение за 29, останатите - жртви на партиски пазарења

Добивај вести на Viber

Левица ја осудува постапката за прием на кандидати за стручно оспособување и усовршување за офицери во Армијата на Република Македонија, бидејќи како што велат, наместо 60, по обуката под сомнителни околности биле примени само 29 пријавени.

„Министерството за одбрана јавно објави конкурс за 60 кандидати распоредени во различни служби, 74 лица успешно ги поминале сите селекциски фази вклучително и физички и медицински проверки. Сè до последен момент најуспешните кандидати биле во уверување дека се примени, согласно објавената потреба на конкурсот и ранг листа на примени. Но, со конечното Решение на министерот Владо Мисајловски, примени се само 29.

Всушност, останува непополнета 31 позиција согласно првично објавениот конкурс, а 15 кандидати кои требало да бидат избрани - не се нашле во Решението на Министерот без притоа да им дадат какво било образложение. Од Министерството нема никаков одговор ниту за тоа зошто се осмелиле спротивно на одредбите од Конкурсот да го намалат бројот на примени кандидати.

Се наметнува прашање: Дали оваа 31 непополнета позиција е намерно оставена за подоцнежно пополнување преку посебен конкурс со спуштени критериуми и етнички клуч, мотивиран од ВРЕДИ откако ДУИ изрази незадоволство дека „нема доволно Албанци меѓу примените“? Дали е ова уште една потврда дека во НАТО членкатс стручноста и заслугите се жртвуваат заради политички договори и партиски пазарења?

Овој скандал претставува не само флагрантна дискриминација, туку и директен удар врз довербата на младите во институциите. Наместо да бидат наградени за трудот, знаењето и способностите - тие се отфрлаат без објаснување, што дополнително го поттикнува масовниот одлив на образован и квалитетен кадар во странство.

Постојат цврсти правни основи за поднесување на најмалку 15 управни и судски тужби против Министерството за одбрана поради самоволното игнорирање на конкурсните одредби и резултатите од рангирањето. Секој изгубен судски процес, предизвикан од ваквите незаконски одлуки, ќе се плаќа од џебот на граѓаните. Но, очигледно, за министерот Мисајловски на прво место се партиските директиви, а интересите на народот и државата на последно“, гласи реакцијата на опозициската партија.