ОДЛОЖЕНО СУДЕЊЕТО ЗА УБИСТВАТА НА ВАЊА И ПАНЧЕ: ќе им се суди заедно со првоосомничениот Палчо

Добивај вести на Viber

Судењето против обвинетите четири лица, кои се теретат за убиство на малата Вања Ѓорчевска и на велешанецот Панче Жежовски, кое беше закажано за денеска, се одложува. Одлагањето се прави со цел во судскиот процес да биде вклучен и првоосомниченот Љупчо Павлевски Палчо, за кого пред неколку дена од обвинителство информираа дека е завршена истражната постапка. 

- Основното јавно обвинителство (ОЈО) Скопје до Основниот кривичен суд Скопје денеска достави предлог за одлагање на закажаното судење за двојното убиство на Вања Ѓорчевска и Панче Жежовски - соопштија од Кривичниот суд.

Од таму додаваат дека истрагата против првоосомничениот Љупчо Палевски Палчо е завршена и по истек на законските рокови во кои Палевски има право на увид во доказите од истрагата, ќе биде поднесено обвинение, кое исто така се однесува на двојното убиство по што ќе биде поднесен предлог за спојување на обвинението против него со обвинението против другите четворица обвинети.

- Имено, со оглед на фактот дека истрагата против осомничениот Љ.П. е завршена и по истек на законските рокови по известување за завршена истражна постапка, ќе биде изготвено и поднесено обвинение, кое се однесува за истиот кривично – правен настан за кој се води и предметот К.бр. 1339/24 против четворица други обвинети, а воедно се работи и за исти докази, од ОЈО Скопје, согласно чл. 28 од ЗКП ќе биде поднесен и предлог за спојување на двете постапки.

На почетокот на јули, скопскиот Кривичен суд во целост го одобри обвинението против четворица обвинети во овој случај.

Почетокот на судењето беше закажано за 30 јули годинава.

За убиството на Вања Ѓорчевска и Панче Жежовски обвинети се четври луѓе, за првоосомничениот Палевски истрагата заврши, а во тек се истражни дејствија против возачот кој го возел Палевски од Србија до Турција.