Со модерни планови до одржлив развој на општините

Добивај вести на Viber

Општините во државата сега имаат пристап до нова современа методологијата за изработка на интегрирани локални развојни планови. Новата методологија става акцент на родовите прашања, инклузијата, зелениот договор и зголеменото граѓанско учество. Притоа, во предвид се земени и новите предизвици со кои што се соочуваат општините – деградацијата на животната средината, социјалните прашања и функционирањето во услови на зголемени ризици од различно потекло.

Методологијата ја подготвија Министерството за локална самоуправа и Програмата за развој на Обединетите нации (УНДП) во рамките на проектот „Јакнење на општинските капацитети за имплементација на проекти“.

Методологијатаима за цел да им помогне на локалните самоуправи да изработуваат подобри интегрирани локални развојни планови базирани на квалитетни податоци, со реални и остварливи цели за следните четири години.

Со неа се предвидува да се направи и финансиска анализа на приходите и трошоците на општините за последните три години, како и анализа на тоа каков буџет се очекува во наредните три, за да се утврдат можностите и капацитетите.

Една од важните цели на процесот е и да се обезбеди поголемо граѓанско учество, не само како консултација за поединечни проекти, туку како вклученост во стратешкото планирање на општинскиот развој. На овој начин треба да им се помогне на општините секогаш да имаат подготвени проекти кои чекаат реализација, наместо да почнат да ги смислуваат кога ќе се укаже можност за финансирање.Со тоа тие би биле подобро подготвени и за спроведување на проекти поддржани од Европската унија во процесот на интеграција на земјата во ЕУ, во кој ќе им станат достапни повеќе фондови.

Проценето е дека околу 70 отсто од европското законодавство треба да се спроведе на локално ниво, поради што токму општините треба да бидат подготвени за новите предизвици, посебно во делот на животната средина и на спроведувањето на Зелениот договор на локално ниво. За да се стекнат со соодветни капацитети за подобро вклучување во евроинтегративниот процес, општините треба да ги применат европските принципи на функционирање што се рефлектирани во новата методологија.

Методологијата за интегрирано локално развојно планирање“ е подготвенаво рамките на проектот „Јакнење на општинските капацитети за имплементација на проекти“, финансиран од Шведска и од Бирото за регионален развој и имплементиран од страна на Програмата за развој на Обединетите нации (УНДП).

Публикацијата „Методолошки насоки за интегрирано локално развојно планирање“ е достапна тука.

Повеќе информации за подготовка на Интегрирани локални развојни планови погледнете на  видеото на следниот линк .