ОЈО ЗА ИВАНОВСКА: Постапуваме по приватна кривична пријава, поканата е испратена на 25 јули

Добивај вести на Viber

Против поранешната претседателка на Антикорупциската комисија и актуелна кандидатка за градоначалник на Општина Центар, Билјана Ивановска била поднесена приватна кривична пријава во февруари годинава, информираат од Обвинителството.

„Јавен обвинител од Основното јавно обвинителство Скопје постапува по приватна кривична пријава поднесена на 18.02.2025 година и презема дејствија за да ги провери наводите. Како едно од дејствијата е испитување на наведеното лице кое во периодот на кој се однесува пријавата била претседателка на ДКСК. Поканата за испитување од обвинителството е испратена на 25.07.2025 година и на ниту еден начин не може да се доведе во релација со политичките активности на поканетата“, соопштија од ОЈО.

Начинот на достава, односно преку полиција, бил избор на предметниот јавен обвинител.

„Испраќањето покани преку МВР не е невообичаена постапка и се користи често, бидејќи има проблем со редовност во достава од редовна пошта. Во конкретниот случај, начинот на достава е избор на предметниот јавен обвинител“, појаснуваат од Обвинителството.

Иако истрагата е водена од февруари, Ивановска ниту еднаш досега не била повикана на разговор во обвинителството.

Поранешната претседателка на ДКСК претходно информираше дека по 11 часа откако се кандидираше за градоначалник, ја побарала полицијата за да и врачи кривична пријава.