Оливер Андонов планиран за директор на Јасен - Се подготвува ли сценарио?

Добивај вести на Viber

Оливер Андонов кој само еден ден беше министер за внатрешни работи се претпоставува дека е предложен за нов директорот на ЈП Јасен, каде се наоѓаат воени скривници во кои според Фокус ќе се стационираат државните функционери во „Пуч“ сценарио при кое би се апселе припадниците на опозицијата и сите критичари. Засега Андонов не потврдува дека е назначен на оваа функција бидејќи чекал официјална потврда, ниту пак има точни информации дали е навистина предложен.

„Не знам дали сум поставен за директор, кога ќе добијам документ дека сум именуван тогаш ќе можам да зборам, се дотогаш е се во сфера на шпекулации. Треба да видам, да идам таму да се јавам, некој можеби ме предложил, тие институции функционираат со Управен одбор. Кога ќе добијам таква одлука ќе коментирам“, изјави Андонов за Фокус.

Фокус во петокот објави дека дознава за организирана посета на специјално избран армиски и разузнавачки тим од страна на претседателот и лидерот на ВМРО-ДПМНЕ, на воено-инфраструктурните објекти во шумскиот резерват „Јасен“ која се случила пред Велигден. Средбата имала мисија за нивна подготовка за сместување на Груевски, Иванов и нивните семејства, за евентуално прогласување на воена состојба.

Во „Јасен“ се наоѓа бункер на поранешната ЈНА во кој Иванов подготвува терен за засолнување, доколку прогласи воена состојба под изговор дека се подготвува државен удар.

Воениот штаб и засолништето во „Јасен“ треба да му послужат на Иванов за командување со операцијата на апсење на „пучистите“ откако СДСМ и партиите на Албанците ќе изберат собраниски спикер и влада.

Со реализацијата на едно вакво сценарио, како дел од операцијата би се случиле и апсења, по примерот на Ердоган по ланскиот пуч во Турција. Ако се оствари ова сценарио, планот е прво да се уапсат 30-40 пучисти, меѓу кои и највисоките претставници на опозицијата, а потоа уште 300 или 400 други соработници на опозицијата од граѓанскиот и бизнис секторот и други јавни личности. Дел од сценариото е и контрола врз медиумите но и ограничувања на Интернетот и социјалните мрежи.