Омилениот конгресмен на Путин не нарекува „новоименуван народ“

Добивај вести на Viber

Дејна Рорабакер, републиканскиот конгресмен од Калифорнија, кој во американската јавност важи за омилен законодавец во САД на рускиот претседател Владимир Путин, го поздрави Договорот меѓу Скопје и Атина нарекувајќи ги Македонците „новоименуван народ“. Тој во македонската јавност е познат како голем провокатор, бидејќи лани во февруари при гостување во Албанија рече дека „Македонија не е држава“.

Преку неговата официјална страница, по потпишувањето на Договорот во Нивици (Псарадес) на брегот на Преспанското Езеро во Грција, тој вели дека посебно го радува благонаклоноста со која „новоименуваниот народ го прифаќа својот идентитет“ како Северномакедонци.

„За мнозина од нас, оваа работа изгледа тривијално, во најдобра рака како мал проблем. Но за луѓето во регионот, тоа беше сериозно вознемирувачки проблем во меѓудржавните односи. Ги комплицираше трговијата и дипломатијата и требаше да се разреши мирно“, објаснува Рорабакер.

Тој во соопштението посебно се задржува на „благонаклоноста“ со која народот го прифаќа новиот идентитет како Северномакедонци“.

„Од срце го поздравувам овој договор и се надевам на брза ратификација од законодавните домови во двете земји. Ова е уште еден доказ дека растечките сентименти посветени на националните интереси по целиот свет може спокојно да се третираат и дека несогласувањата може да се разрешат во духот на мирот и соработката без интервенции на глобалистичките суперсили. Посебно ја поздравувам благонаклоноста со која новоименуваниот народ го прифаќа својот идентитет како Северномакедонци“, вели Рорабакер.