Опозицијата во благо водство, но и владеачката коалиција се прогласи за победник во Албанија?!

Добивај вести на Viber

Во отсуство на официјални резултати, и владејачката коалиција на премиерот во заминување Сали Бериша и левичарската коалиција предводена од социјалистот Еди Рама тврдат дека победиле на парламентарните избори што вчера се одржаа во Албанија.

Меѓутоа, според првичните нецелосни резултати, опозицијата е во благо водство. Лидерот на социјалистите Еди Рама изјави дека силите на злото биле победени.

Според Социјалистите опозицијата освоила 55,5 проценти од гласовите, наспроти 43,5 на власта. Демократите на Бериша, пак, тврдат дека тие победиле. Владејачката партија освоила 48 отсто од гласовите, наспроти 46 на опозицијата, пренесе Радио Слободна Европа.

На вчерашното гласање биле забележани неколку инциденти, а најголемиот се случил во градот Лач, северно од Тирана, каде што во пукање во близина на гласачко место било убиено едно лице, а три биле повредени, вклучувајќи и еден изборен кандидат од Демократската партија на премиерот Сали Бериша. „Ги повикав сите Албанци да гласаат цивилизирано. Нивниот глас ќе биде почитуван“, изјави Бериша. До пукањето наводно дошло по расправија меѓу симпатизери на Демократската партија на Бериша и на опозициското Социјалистичко движење за интеграција на Еди Рама. „За жал овие избори почнаа со убиство во дел на земјата каде луѓето се тероризирани од криминалци и каде нема полициска контрола“ кажа Еди Рама. По инцидентот биле уапсени седум луѓе.

Има и извештаи за насилство врз новинари, пренесува АП. На еден новинар не му било дозволено да влезе во гласачко место, камера на приватната ТВ-станица „Топ ченел“ била скршена, а еден камерман бил претепан.

Двете страни во текот на кампањата се обвинуваа за разни неправилности. Демократите на Бериша ветуваа нови инвестиции и повисоки плати и пензии, а социјалистите на Рама расчистување со криминалот и корупцијата во Албанија.