ОПОЗИЦИСКИТЕ ГРЦИ УПОРНИ: Македонија може да биде „Централна балканска република“

Добивај вести на Viber

Коалицискиoт партнер во владата на Алексис Циплас, партијата „Независни Грци“, не отстапува од својата позиција против сложено име и вклучување на терминот Македонија во него. 

Од партијата велат дека само ќе го прифатат името „Централна Балканска Република“. 

Заменик-министерот за земјоделство, Василис Кокалис, портпаролот на партијата Мадалена Пападопулу и заменик-претседателот на парламентот Димитрис Каменос, кои се од „Независни Грци“, во одделни интервјуа истакнаа дека не го прифаќаат терминот Македонија во името на „соседната земја“.

„Ние, „Независни Грци“, велиме „не“ на употребата на името Македонија или производни зборови, а предуслов за секое решение е уставна ревизија, промена на Уставот, бидејќи нема ниту македонска националност, ниту македонски идентитет, ниту постои македонски јазик и се разбира одлуката да биде „ерга омнес“, рекла Мадалена Пападопулу пред грчката телевизија „Скај“. 

Заменик-министерот за земјоделство Василис Кокалис исто пред телевизијата „Скај“ изјавил дека до неколку дена ќе се знае дали преговорите ќе завршат со договор. Тој упатил и критики кон македонската страна. „Три пати ја прекршија Времената спогодба од 1995 година и се гледа како преферираат имиња кои имаат иридентистичка цел, како што е Северна Македонија, како што е горна Македонија“, рече Кокалис. 

Тој додаде дека приврзаниците на составно име, кои се мнозинство меѓу политичките партии, но не се мнозинство од грчкото општество, треба да му објаснат на грчкиот народ „зошто од страна на Скопје се бескомпромисни“.

Еден од потпретседателите на грчкиот парламент, Димитрис Каменос, исто така од редовите на „Независни Грци“, изјавил дека неговата партија, ако во парламентот дојде име без терминот Македонија, би гласале „за“, но инаку остануваат на нивната позиција . „Ако во Македонија нема име, ако се вика, на пример, Централна Балканска Република, сигурно ќе гласаме“, изјавил Каменос за „Скај ТВ“. 

Тој откри дека се сомневал дека пратеничката група на „Независни Грци“ би можела да има пратеници кои ќе го поддржат композитното име, и во тој случај тие мора да ја напуштат партијата. Во однос на претстојните протести, заменик-министерот за земјоделство Кокалис објасни дека „политичар се оценува според позицијата и гласањето во парламентот, а не од неговото присуство на протестите“. Додека неговиот сопартиец Димитрис Каменос рекол дека ако има протест во Атина, тој ќе отиде.