Орка холдинг, Тим и Езимит нови газди на Бетон-Штип

Добивај вести на Viber

Штипски „Бетон“ доби нови газди. Во изминатите две седмици 51,2% од акциите купија друштвото за градежништво „Тим“ (20,4%), штипската винарска визба „Езимит“ (15,8%)  и „Орка Холдинг“ (15%). Новите сопственици се веќе впишани во централниот депозитар. Меѓу оние кои ги продадоа своите удели во овие трансакции се Илија Бреслиски, генерален директор на „Бетон Штип“ кој поседуваше 20% од компанијата и хрватскиот приватен инвестициски фонд „НФД Ауреус“ (18,3%). Купопродажбата на акциите се изврши преку три блок трансакции на Македонската берза. Единечната цена на акциите при продажбата беше 1.620 денари, 2.000 и 3.000 денари, а вкупната сума достигнува околу 755.000 евра. Нема обврска да се даде јавна  понуда за преземање на слободните акции бидејќи ниту еден од новите сопственици поединечно нема удел поголем од 25%. „Бетон Штип“ има 190 вработени и беше ангажирана на неколку објекти од проектот „Скопје 2014“, меѓу кои Стариот театар и Музејот „Македонска борба“. Првата половина на 2012 година ја заврши со добивка од околу половина милион денари, со побарувања во висина од 1,8 милион евра и со обврски од 2,1 милиони евра.