ОТКАКО СЀ ПОСКАПЕ НА РЕД ДОЈДЕ И ВОДАТА, СЕ КРЧКА НОВА ЦЕНА – скопјани ќе треба да одвојат повеќе пари за услугите

Добивај вести на Viber

Јавното претпријатие Водовод и канализација Скопје бара зголемување на цените за водоснабдување поради зголемени трошоци. Барањето е доставено до Регулаторната комисија за енергетика и водни услуги на Македонија.

-  Се известуваат сите заинтересирани правни и физички лица дека ЈП Водовод и канализација Скопје, на ден 14.11.2022 година до Регулаторната комисија за енергетика и водни услуги на Република Северна Македонија поднесе Барање за измена на план за прилагодување по исклучок, согласно член 17 од Законот за утврдување на цени на водни услуги за водната услуга снабдување со вода за пиење или водоснабдување за 2022 и 2023 година од регулираниот период 2021-2023 година – се наведува во барањето објавено на веб страната на РКЕ.

Во него е посочено дека се бара зголемување на просечната цена на водната услуга снабдување со вода за пиeње за 2022 година на 38,57 денари за метар кубен, додека за следната 2023 година на 38,81 денар за метар кубен. Исто така се бара промена и на цената на услугата собирање и одведување на урбани отпадни води, како што е наведено во табелата подолу.

Со последната одлука на РКЕ, на ЈП Водовод и канализација Скопје им била утврдена просечна тарифа за водоснабдување за 2022 година во износ од 23,24 денари за метар, додека за 2023 година во износ од 23,14 денари за метар кубен. Ова се сегашните важечки цени по кои претпријатието ги наплаќа своите услуги. Сепак, ова не се цените по кои граѓаните ги плаќаат услугите на ЈП Водовод и канализација, туку се тарифите кои им ги одобрува РКЕ согласно пријавените трошоци.

Од веб страната на јавното претпријатие каде е објавен ценовникот за услугите на компанијата, се гледа дека граѓаните односно домаќинствата водната услуга снабдување со вода за пиење ја плаќаат по цена од 18,50 денари. За разлика од нив, за останатите корисници цената достигнува 49,50 денари.

Колкави ќе бидат цените за домаќинствата и за останатите корисници по промената на цената се уште не се знае. Од јавното претпријатие не појаснуваат колку ќе се зголемат цените ниту за домаќинствата, ниту пак за останатите корисници, односно за компаниите. Фактор побара појаснување од ЈП Водовод и канализација околу барањето за зголемување на цените на услугите кои ова претпријатие ги обезбедува за граѓаните, како и податок колку ќе изнесува цената поединечно по измените.

-  Во согласност со Законот за утврдување на цените на водните услуги, ЈП Водовод и канализација - Скопје редовно доставува извештаи до Регулаторна комисија за енергетика. Во однос на тоа до РКЕ соодветно се доставени извештаи за трошоците на претпријатието, кои се зголемени имајќи го предвид зголемувањето на цените на сите ресурси кои ги користи претпријатието. Во овој момент цената на водните услуги и покрај зголемувањето на трошоците како резултат на енергетската криза е непроменета. Околу евентуална промена на цената на водните услуги надлежни се Регулаторна комисија за енергетика и Советот на Град Скопје како основач на претпријатието – пишуваат од ЈП Водовод и канализација.

Фактор дознава дека ова не е единственото претпријатие, чија дејност е снабдување со пиење, кое побарало промена на цените на услугите, поточно нивно зголемување. Напротив, кон ваков чекор веќе пристапиле и многу други комунални претпријатија во земјава.

П.О.