Отплата на кредитите во швајцарски Франци била незаконска, историски ден за судството во Хрватска

Добивај вести на Viber

Граѓаните на Хрватска кои осиромашија отплаќајки ги кредитите во швајцарски франци ја добија битката против банките. Судот во Загреб пресуди дека осум комерцијални банки го прекршиле законот. Ако пресудата стане правосилна граѓаните ќе можат да ги тужат банките и да си ги вратат парите кои ги претплатиле.  Судот во Загреб пресуди дека осум комерцијални банки на кои граѓаните им отплаќаа кредити во швајцарски франци го прекршиле законот за потрошувачи и законот за облигациони односи. Некои од банките најавуваат жалби и порачуваат дека ќе докажат оти работеле законски. Како што јавуваат тамошните медиуми, за јавноста одлуката на судот во Загреб против осумте деловни банки е историски ден за хрватското правосудство, бидејќи граѓаните буквално осиромашиле отплаќајки ги кредитите во швајцарски франци. Во образложението на провостепената пресуда пишува дека банките ги повредиле правата и интересите на граѓаните така што нетранспарентно ги менувале каматните стапки. Според пресудата која ја изрекол судијата Радован Добронииќ тужените банки ќе мора да прекинат со овој начин на работење и во следните 60 дена на клиентите да им понудат главница во хрватски куни од денот на заклучување на кредитот со фиксна каматна стапка. Во Хрватска повеќе од 100 илјади граѓани отплаќаат кредит во франци. Меѓу нив 75 000 се станбени кредити чии рати за кредит во последните неколку години се зголемиле од 35% па дури до 100%. Пресудата се однесува и за корисниците на кредити во други валути. „За мене ова е голема победа на малиот човек во Хрватска. На крајот се покажа дека се исплаќа да се активираш против овие големи системи“, вели Денис Мајо корисник на кредит. Судот утврдил дека банките знаеле оти ќе дојде до промена на курсот на франкот, но за тоа не ги известиле своите клиенти. Пишува и дека банкарите работеле по упатства од своите централи. Во здружението „Потрошувач“ потенцираат дека оваа пресуда отвора нова страница за заштита на потрошувачите во Хрватска.