Од април идната година, за 1.500 денари, Македонците ќе летаат од Скопје за Брисел, Париз и Франкфурт

Добивај вести на Viber

Cо субвенции од Владата, од април идната година, нискобуџетната авиокомпанија „Виз ер“ ќе воведе директни летови од Скопје до Брисел, Франкфурт и Париз, а цената на билетите ќе чини најмалку 1.500 денари. Кон новите три дестинации ќе се сообраќа двапати неделно. Плановите за развој, денеска, на прес-конференција, ги објавија извршниот потпретседател на „Виз ер“, Џон Стивенсон со министерот за транспорт и врски Миле Јанакиески и генералниот директор на ТАВ Македонија, Зоран Крстевски. Авиокомпанијата од април следната година ќе пушти во сообраќај и нов патничкки авион Ербас А-320 со што го зголемува својот возен парк по воспоставената база на аеродромот „Александар Велики“ во Скопје. Јанакиески и Стивенсон најавија и дека „Виз ер“ ќе ги зголеми фрекфенциите на летови за постоечките дестинации. До Малме ги зголемува летовите од пет на седум во неделата, кон Базел, наместо трипати, ќе сообраќа петпати, кон Дортумнд и кон Ајндховен се зголемуваат летовите од два на три, кон Гетеборг од два на четирипати и кон Михнен исто така од два до трипати во неделата. Според министерот Јанакиески, Владата и воздухопловните власти постојано прават напори за привлекување што поголем број авиокомпании за оперирање од македонските аеродроми, зголемување на бројот на патници и овозможување нови дестинации и поевтини билети за граѓаните. Пет топ дестинации за македонските граѓани се Истанбул, Виена, Цирих, Лондон, Љубљана и Малме. „Виз ер“ учествува со 35,2 проценти во вкупниот број патници, по што следат Туркиш ерлајн, Аустрија ерлајн, Адриатик ерлајн и Пегасус. Од ТАВ Македонија посочуваат дека се прават напори за зголемување на летовите кон Италија и повторно воспоставување на линиите кон Будимпешта и Прага.