Паника на светските берзи поради Брегзит
Објавено во: Свет, Финансии 24 Јуни, 2016
Овие денови ќе биде многу профитабилно да се пазарува од британски сајтови, коментира банкарот Левон Хампарцуман.
Паника настана на светските берзи утрово, откако медиумите објавија дека Велика Британија гласаше за излез од Европската унија на вчерашниот референдум, соопштија американските медиуми.
Британската фунта падна на најниското ниво споредбено со три децении период, достигнувајќи и најголем моментален пад во историјата, откако изби пресврт во гласањето и дојде до победа за приврзаниците на Брегзит.
За неколку часа британската валута загуби над 10% од вредноста за разлика од периодот по првите прогнози, кои во рана фаза даваа предност на гласачите за останување во ЕУ.
„Имавме пад од 10% за само шест часа. Гласот за напуштање на ЕУ отвора егзистенцијална криза за Европа"- рече финансискиот експерт, Ник Парсонс.
Цените на акциите на Токиската берза паднаа со над 7%, а златото поскапе со 4%.
За 2-3 месеци ќе стане јасно дали ќе биде надминат шокот од одлуката на Велика Британија за напуштање на ЕУ.
„Оние кои гласаа за отцепување на Велика Британија, треба да се научат да берат јагоди. Ќе се запре приливот на евтина работна сила од Источна Европа. Политички Британија ќе биде најверојатно една слаба држава послаба отколку што е во моментов "- коментира Хампарцуман.
Според резултатите од преброените гласови од сите избирачки окрузи, 17.410.742 избирачи или 51,9% се изјасниле за излез на Велика Британија од ЕУ, додека 16.151.241 или 48,1% гласале за останување на земјата во Унијата.