Пет кандидати за нов газда на „Хеленик Петролеум“
Објавено во: Финансии 05 Јуни, 2018
Грчката агенција за приватизација објави дека пет потенцијални инвеститори изразија интерес за стекнување на мнозински удел во „Хеленик Петролеум“, една од водечките енергетски компании во Југоисточна Европа и сопственик на рафинеријата ОКТА кај Скопје.
Меѓу потенцијалните купувачи на 50,1 отсто од акциите на нафтената компанија се Alrai Group Holdings, Gupta Family Group, Glencore Energy UK, Vitol Holding и конзорциум составен од Carbon Asset Management DWC и Alshaheen Group, велат во грчкиот приватизациски фонд.
Бизнисот на „Хеленки Петролеум“ во Југоисточна Европа вклучува мрежа на бензински пумпи во Грција, Бугарија, Србија, Црна Гора, Македонија, кои работат под брендот EKO, рафинеријата ОКТА во Македонија, како и голем број бензински пумпи во Кипар. Покрај ова, компанијата поседува и три од четирите нафтени рафинерии во Грција, што ја прави водечката нафтена компанија на Балканот.
Акциите на „Хеленик Петролеум“ главно се тргуваат на Атинската берза со секундарно котирање на Лондонската берза, а најголемите акционери на нафтената компанија се Панјуроијан оил анд индустриал холдингс со 45,47 отсто од акциите и грчката држава преку Фондот за приватизација со удел од 35,48 отсто. Останатите 19,05 отсто од акциите ги поседуваат институционални и приватни инвеститори.
Бизнисот на „Хеленик Петролеум“ вклучува трговија со горива, производство на нафта, производство на електрична енергија, истражување и екстракција на нафта и гас, обновлива енергија, консултантски и инженерски услуги.
М.Б.