Пет милиони евра ќе чини гасификацијата на Чаир

Добивај вести на Viber

Општина Чаир ќе се гасифицира, а вкупната инвестиција се проценува дека ќе чини пет милиони евра. Министерството за економија денеска ја презентираше физибилити студијата за гасификација на оваа општина. Во јуни Владата ќе ја започне потстапката за избор на концесионер за проектот, најави министерот Ваљон Сарачини. „Од проценетите пет милиони евра, 860 илјади евра се предвидени за примарната дистрибутивна мрежа, а 1,6 милиони евра во секундарната мрежа. Останатиот дел во износ од 2,3 милиони евра се за изградба на приклучоци и адаптација на постоечката опрема. Обезбедувањето на вкупната инвестиција е обврска на приватниот партнер и е предвидено да се реализира преку кредити во износ од 70 отсто, а 30 отсто од средствата ќе бидат на приватниот партнер“, појасни Сарачини. Гасоводната мрежа ќе се гради во две фази. Во првата ќе се изгради магистралниот вод, заедно со секундарните и приклучните водови, како и приклучоци за сите јавните објекти, а во втората фаза, развојот на гасоводот би зависел од желбите и можностите на корисниците, приватниот сектор и домаќинствата. Студијата покажа оти придобиките од овој проект ќе бидат енергетски, економски и еколошки. Ќе се зголеми сигурноста на снабдување и енергетската ефикасност, а тоа ќе значи помали финансиски трошоци за енергија за сите корисници. Најзначајната придобивка е намалување на емисијата на штетни материи и со тоа поголема заштита на животна средина.