Плаќање преку мобилен телефон, MobiPay достапно и во Македонија

Добивај вести на Viber

На своите корисници „Т-Моbilе“ во партнерство со „НЛБ Тутунска банка“ од денес им овозможува да го користат мобилниот телефон и како паричник.

MobiPay овозможува сосема нов начин на безготовинско плаќање преку мобилен телефон, директно од банкарската сметка во НЛБ Тутунска банка. Со активирање на MobiPay, мобилниот телефон станува виртуелен паричник во кој може да се сместат повеќе платежни картички.

„Мобилното плаќање е една од оние услуги каде новата технологија е целосно во функција на корисникот. Пред само десетина години мобилниот служеше единствено за разговор и СМС, а сега станува мултифункционална алатка, се во едно, која на крајот на денот го прави животот полесен, а тоа и треба да е крајната цел на модерните технологии. Со Moby Pay корисниците добиваат вредност повеќе, можност повеќе без никаков надомест“, изјави Жарко Луковски, Главен извршен директор на T-Mobile Македонија.

„При купувањето клиентите ќе немаат потреба да носат платежни картички или новчаник туку само нивниот мобилен телефон. Генерално, најголемиот предизвик при извршување на плаќањата е како на практичен, брз, безбеден и едноставен начин тоа да се реализира. Сите овие аспекти се присутни во MobiPay функционалноста“, изјави Ѓорѓи Јанчевски, Претседател на Управен одбор на НЛБ Тутунска банка.

За активирање на MobiPay, T-Mobile корисниците потребно е да имаат картична сметка во НЛБ Тутунска банка за која треба да потпишат договор со Банката, при што сметката ќе биде поврзана со мобилен број на корисникот и ќе му биде издаден ПИН за верификација на секоја трансакција извршена со телефон. Средствата за плаќање ќе се одземаат од картичната сметка, а не од телефонската сметка. На овој начин, мобилното плаќање е достапно за сите припејд и пост пејд корисници на T-Mobile.