По 3.500 евра казна за нелегалните продавачи на охридска белвица и пастрмка

Добивај вести на Viber

Во угостителските објекти, рибарници и други овластени субјекти што вршат промет на риба на Охридско-струшката ривиера, на почетокот на овој месец спроведоа интензивирани контроли Инспектори од Одделението за инспекциски надзор од областа на рибарството со аквакултура при Државниот инспекторат за земјоделство.

Притоа констатирано е дека некои од правните субјекти не поседувале документи за потеклото на рибата, односно била набавена и пуштена во промет од рибокрадци и преку нелегални трговци. Во рамки на акцијата спроведена на 1-ви овој месец биле одземени и отстранети од промет околу 30 килограми охридска белвица и пастрмка, а на правните субјекти што поседувале и набавувале риба без документ за потеклото им се изречени парични казни во износ од по 3.500 евра.

Во текот на вчерашниот ден во заедничка акција на полицијата и Државниоот инспекторат за земјоделство бил спречен албански државјанин во обид да прошверцува риба за соседна Албанија. Притоа биле запленети и одземени околу 30 килограми охридска белвица и крап.

Државниот инспекторат за земјоделство, односно Одделението за инспекциски надзор од областа на рибарството и аквакултурата со седиште во Охрид ги потсетува угостителските објекти и рибарниците, како и сите чинители што се овластени да вршат промет на риба на нужноста од почитување на Законот за рибарство и аквакултура, конкретно одредбите што се однесуваат на неопходноста од поседување придружни документи за потеклото на рибата наменета за промет, како и на почитување на Правилникот за квалитет, големина, тежина и начин на декларирање на рибата наменета за промет.