ПО ПАНДЕМИЈАТА: Во 10 земји ќе има глад од библиски размери

Добивај вести на Viber

Пандемијата на коронавирусот ќе резултира со до сега невиден глад во светот, што ќе има библиски размери, предупредуваат денеска Обединетите нации. Проценките се дека бројот на гладните двојно ќе се зголеми, дури 250 милиони луѓе ќе молат за корка леб. Шефот на Светската програма за храна, Дејвид Бесли изјави дека во овој момент се итно потребни акции за да се избегне големата катастрофа што го очекува светот по пандемијата.

Во најголем ризик се 10 држави кои сега, освен со пандемијата, се соочуваат и со војни, економска криза и климатски промени, па во четвртиот глобален извештај за кризата со храна се наведени Јемен, Демократска Република Конго, Авганистан, Венецуела, Етиопија, Јужен Судан, Судан, Сирија, Нигерија и Хаити.

Пред пандемијата на корона вирусот делови од источне Африка и јужна Азија, веќе децении наназад се соочуваат со недостаток од храна како резултат на сушата.

Обраќајќи се во Советот за безбедност на Обединетите Нации, Бесли истакна дека светот мора мудро и брзо да делува.

- Би можеле да се соочиме со глад од библиски размери во рок од неколку месеци од сега, изјави тој.

Истовремено, економскиот аналитичар во Светската програма за храна, Ариф Хусаин рече дека економското влијание на пандемијата ќе биде катастрофално за милиони луѓе.

-Ова е удар со чекич за милиони во светот, кои единствено може да јадат само ако заработат. Мора веднаш колективно да се делува, барем за да се ублажи влијанието од пандемијата на коронавирусот, изјави Хусаин.